Koejong vaan mestreech

Hubèrke wèl al z’n hiele leve ’t podium op. Tot noe touw is heer neet weijer gekoume es de tap vaan de Rembrandt in de stad. Meh nao ein auditie bij de Mestreechter Musical Vereneiging MMV is heer oetverkoze tot ein vaan de houfrolspeulers vaan de nui productie ‘De graof vaan Mestreech’. Zoe maak heer oet ierste haand mèt wie ’t is um staar in de zaank te weure. Oondertösse sterf z’ne pa dee z’ne pa neet is, drejt z’n ma, die obbins z’n ma neet mie liekent, totaal door en kump heer in kontak mèt alles wat naom en rang heet in de stad. En alles bliek gans anders te zien es ’t d’r op ’t ierste oug oetzuut. Tempeleers, börgemeister en ex-börgemeister, Veldeke, de ganse toneelwereld en de meziekwereld wurt in deze vermakeleke satire op de hak genome. Oondertösse vräög ederein z’ch aof wee dee sjrijver vaan Koejong vaan Mestreech toch is. Jeh, es v’r dat ins wiste! Väöl plezeer.